قرأتها فأعجبتني ..
قصة زلام .. زي النسوان 👩🏼👰🏻👩🏾👵🏽
👨🏻 اسمع هاظ فريد صاير زلمة مش ولا بد ، وبتقدر تقول صاير زي النسوان ..!
👦🏽 كيف يعني !؟
👨🏻 زي النسوان كمان هي بدك ا شرحها
👦🏽 لا اكيد ما بدي تشرحلي ياها انا بشرحلك ياها احسن ...
انا بالنسبة الي زي النسوان ..... زي امي اللي ربنا رمّلها واحنا صغار ، وعمرنا ما حسينا باليتم ولا حسينا إنّا اقل من اي حدا ، كانت تشتغل عشر شغلات مع بعض ومع هيك اخر النهار بتقولناا الله يعطيكم العافية يما ، الله يرضى عليكم .. ..
عشو يما يعطينا العافية !؟ لو نشتغل ربع شغلك ، ليفكر الواحد فينا حالو نبي !
زي النسوان ...... زي مرتي اللي صابرة على وضعي ، واكبر مشكلة مالية بتلاقيلها حل اقتصادي وبتجدول المديونية احسن من وزير الاقتصاد ، ومحسسه العالم كلو اني ما في مثلي ، وبتخلي كل الدنيا تغار منها بترتيبها وتربايتها لاولادنا ، واناقتها تقول اميرة ، وكل هاظ من اقل اشي ومرات من ولا اشي ..
زي النسوان ........ زي اختي اللي كل ما احتاجها بلاقيها سند و عمرها ما سكرت باب بيتها بوجهي ، واذا كانت برة البيت بتقلي : انطم ، بتضل عالباب خمس دقايق بكون عندك ، و بتيجي بثلاث دقايق ...
زي النسوان ...... زي بنت عمي اللي تركها جوزها عشان طموحاتو الوردية ، وتركلها ولدين صارت الهم ام واب ومعلمة ، ولا رضيت حدا يحملها جميلة و ربت ولادها احسن تربايه وعايشه احسن منا كلنا ...
زي النسوان ..... زي خالتي ، كل اللي حوليها ضحكوا عليها لما بدت مشروعها من الصفر ، و من ولا اشي هسع بتصرف عجوزها وولادها ونص قرايبها ..
زي النسوان ..... زي عمتي اللي الله ما كتبلها تتجوز ، بس مع هيك الضحكة علامتها الفارقه و اللي بدو يفرح ويضحك ويريح قلبو ويدلع كرشو 😜 بروح عندها
زي النسوان ..... زي جارتنا اللي جوزها هامل ، قرر يقعد بالدار ، لا شغلة ولا عملة وبستنى صدقة الناس ، بس لانها عزيزة نفس ما رضيت الذل و بتطلع بتشتغل بالمدارس والبيوت و بتنظف وبتحفر كوسا وبتعمل جبنه ولبنه ومن تعبها علّمت وخرجت ولاد وبنات طلعوا احسن من نص ولاد الحارة اللي اهلهم بحمموهم بالمصاري ..!
وان شاء الله بكرة بتكبر بنتي وبتصير زي النسوان وبترفع راسي
هظول النسوان اللي بعرفهم ، فلا تحكم عالنسوان كلهم من خلال بيئتك وبيتك بس ..! مش كل النسوان زي امك وخواتك ..! واذا زي النسوان مسبة عندكم
فانا بحط كلمة زي النسوان وسام على صدري 🎖🎖🎖
#اعملولها_منشن وقولولها : شكرا لانك كنتي طول عمرك #زي_النسوان
#افتخر
#امي_ملكة_النساء
20-06-2014, 05:18 PM
رد: إمرأة
العرض العادي
