يا ظريف الطول

[إياد حياتله]

	يا زريف الطول ويا نصر اْبتهِجْ= واْدعي للرحمن يفرجها فرِجْ بكرة تشوف الزين وقلبك يختلِجْ= ويصير يغنّي دلعونا وميجنا

[عبد الرحمن أبو شندي]

يا زريف الطول يا ام المنديل=يسعدلي هالكحلة والشعر الطويل
وانا شو ما قلت في حقك قليل=يا زينة هالحارة حني علينا

[إياد حياتله]

	يا ظريف الطول والليله كريسْمَسْ= في هذي لِبلاد والكلِّ هَسْهَسْ وانا قاعد هون ما اْقدر اْتنفّسْ = روحي مع هَلي تقشّر كستنا

[نصر بدوان]

يا زريف الطول طار من الفرح = رفرف بجنحينه قلبي اللي انشرح
يا هناه اللي فعيونك سرح = رضا رب البيت ورضا الوالده

[عيسى عدوي]

يازريف الطول ما أحلى البلاد = في شهر كانون في عيد الميلاد
وإنت بوسط الدار قاعد يا أياد = بدال البلوط بتشوي كستنا

[إياد حياتله]

	يا زريف الطول وأيّامِ لِبلادْ= علوّا ترجع علوّا تنعادْ نلعب فوق الحيط بناتِ واْولادْ= والضحكة شبر على وجوهنا

[نصر بدوان]

يا زريف الطول بتحلم يا إياد = أحلام اليقظه تا ترجع لبلاد
والنصر معقود باخلاص الجهاد = ما ترجّع لبلاد خيانه وزعرنه

[إياد حياتله]

	يا زريف الطول هذا ما بيعنيشْ= كنّو في زعران ما نقدر نعيشْ مصير الزعران يا خوي التهميشْ= واحنا عم نبني لاْجل ولادنا

[نصر بدوان]

يا زريف الطول تسلم يا إياد = همّي ع الوطن وهمّك ع الاولاد
يا هدى الرحمن يا درب الرشاد = يا مفرج الهموم تفرّج همّنا

[عيسى عدوي]

يا زريف الطول من عندي وديت = ورده للحجاج اللي طافوا بالبيت
ياللي ربك راد و كبرت ولبيت = بكره في عرفات والليله بمنى

[إياد حياتله]

	يا زريف الطول وحيّك من لبّيت = بقلبك الملهوف ندا ربّ البيت بكرة اْن شالله تعود بعد ما حجّيت= بميّة زمزم تَ نروي عروقنا

[إياد حياتله]

	يا زريف الطول وحيّوا بو العبِدْ=رايح على الحج يا يوم السّعِدْ والنصر قريب من الله الوعِدْ=أنصرنا يا رب عَ أعدائِنا يا زريف الطول والليلة بمِنى = ملايين الحجّاج مرّوا من هِنا صلّي يا رحمن عَ نبيّنا = بيوم الحساب رحْ يشفع لِنا